Col 4 | GAM | STEP | Ye kantau yenj una kambono, ye Iwa Kerman kupill al moro pille, ye nu kogo una mor al singare du dje paro mal ye aune.

Colossians 4

1 Ye kantau yenj una kambono, ye Iwa Kerman kupill al moro pille, ye nu kogo una mor al singare du dje paro mal ye aune.

Nono singare yembon mal

2 Ye kamang ye pa moye, nakerne. Ye pillpol to, wopake we dje awo kamang yene. 3 Alla ye no pille kamang ye aune. God no kond ta tondaka no Krais kandjiye seke pai ge dje una aumbon. Kandja embe dje wanill al ge, una na to kaye wori moro. 4 Ye na kamang ye auneke, na Krais kandjiye kune ye dje una auno. God na djino dje pro mal djino. 5 Ye orko una boll moye ge, ye God nomane boll molo yene. Kond wopake yei dal, ye ga Jisas boll pillgi djine dje yene. 6 Ye una boll kandja djine ge, kandja djugo yenda kandja djineke, una wopake piye. Ye embe yei dal, ye una boll kandja dje yem worbon dje yene kune yenda.

Pol Tikikus ne, Onesimus dje Kolosi wori

7 Tikikus wo ye mor al na yendo mal dje aunda piye. Na nu kogo ye Iwa Kerman aundo mal ge, Tikikus para embe yendo. Une na agana wopake molo Iwa Kerman kogoye paro mal yendo iwa. 8 Na ye mor al une dje wordo ge me embe mal paro, ye no mormon mal dje aundaka ye piyeke, une ye ellne tukne ye arngan ye aunda moye. 9 Une Onesimus ^{▼▼4.9Onesimus ge Pilemon nu kogoye una. Pol pepa bolo Pilemon awi ge ye kere kanne.} boll wombell. Onesimus ge ye unakne. Une nono agane wopake molo yene kandja djindo mal yendo. No mormon mal soka wo ye dje aumbell piye.

Pol Kolosi una wopake we dje awi

10 Iwa Aristarkus na boll kaye parmoll, une ye wopake we dje aundo. Mak para ye wopake we dje aundo, une Barnabas wambe moro. Na kandja sigye dje ye awill mal, Mak ye boll woi dal, ye dje i numog worne. 11 Iwa Jisas kandjiye ta Jastus we dji ge, une wopake we dje ye aundo. Ga kambono Juda una molo God dumoye kantau yendo al ge na boll kogo yenj. Juda una ta man. Ga embe yenjka na arngan yendo. 12 Ye unakne Epapras Krais Jisas nu kogo iwa ge, une ye wopake we dje aundo. Une ye pille kamang dongall ye aundo. God ye singare yene dje pro mal ye nomane gi dje pandaka aglo gi dje kaima molo kerne. 13 Na kandja embe dje aundo, Epapras ye pille kogo dongall ye aundo. Dumo Laodisia una ne, dumo Hierapolis una mor ge, une para pille kogo dongall ye aundo. 14 Dokta Luk ^{▼▼4.14Una merke embe dje pir, iwa Luk we dji ge, Baibel buk soka boi. Ta Aposel, ta Jisas Kandjiyembe wopake Luk boi.}, nono agane wopake moro ge, une iwa Demas boll molo wopake we dje ye aumell. 15 Na wopake we dje aundo ge, ye nono agane dumo Laodisia mor ge dje aune. Ana Nimpa ne, ga pillgi pai una une numbiye al makai to mor ge, ye na wopake we dje aundo mal po dje aune. 16 Ye pepa ge kere kane pagle, dumo Laodisia pillgi pai una auneke kere kanne. Alla pepa ga kere kaninj ge, auneke ye kere kanne. 17 Iwa Arkipus moro al ye kandja embe dje aune, Iwa Kerman ni kogo yemben we dji mal ge ni ye pora djimben. 18 Na Pol, na ye wopake we dje aundo ge, nanam aglena al pepa boll. Na kaye paro ge ye pille moye. God ye wandill golo aunda moye.